Skip to content
最新資訊
跳出舒適圈拍《一日妍究生》系列短片 
08/21/2022
<strong>跳出舒適圈拍《一日妍究生》系列短片</strong> 

黃妍揸帆船雞手鴨腳 好學肯學獲讚賞 

為跳出舒適圈,黃妍(Cath)近期作出不同嘗試,在拍攝系列短片《一日妍究生》中繼學習粵劇基本功及跳肚皮舞後,不熟水性的Cath早前竟然出海學揸帆船。雖然學習過程中Cath表現忙亂,但好學肯學的態度獲船長大讚! 

Cath本身不懂游水,所以出海前她甚擔憂,並說:「因為我驚水同離心力,拍攝呢兩日天氣都有啲差,所以喺水上面會遇到我最驚嘅水同離心力,所以擔憂比較多。」她更笑說出海心情從未被影響過,因為由始至終都係擔憂居多。因為出海,愛美的Cath也帶齊出海三寶:太陽眼鏡、帽及太陽油,除此之外,她更帶了兩支水以備不時之需,但怎料全部都用不著,她說:「因為陰天,太陽少少倀眼,但太陽眼鏡冇用到,帽亦冇用,因為現場好混亂,帶咗太陽油,本以為途中可以搽下但原來係好唔得閒。」的而且確,Cath既要學習揸帆船的基本知識,更要掌舵兼平衡船身,也忙得無暇理會其他事情了。 

雖然驚水,但短片中可見Cath未有穿上救生衣,她解釋道:「我哋一上船就先教著救生衣同講曬所有安全措施,到我想著時同事就話好醜呀!影出嚟唔靚,同埋話如果我跌咗落水佢哋會救我,咁我哋惟有相信佢哋。」不過鏡頭外同事都不停擰頭,Cath搞笑道:「但我已經信咗佢哋喇!感謝主我冇跌落水,所以我到而家仲健在。」其實Cath擔心同事多過自己出事,續說:「揸船時好擔心會揈跌啲同事落水,但我哋出船時有9個人,而家拍攝完成都有9個人,所以我哋係安全嘅,教揸帆船嘅導師仲讚我,雖然力唔夠但叫我做咩都很做,願意學。」 

跳出舒適圈拍《一日妍究生》系列短片 

經過今次體驗後,Cath不僅長知識,了解到帆船的特性,她說:「我原本以為船size會細啲,但原來比較大;然後又以為所有嘢會好原始,例如冇廁所、冇電,但原來有廁所仲要有電,船上又有雪櫃等等,好高級。起初我又以為所有嘢要用風,但原來有引擎,而結構比想像中複雜。」 

不熟水性,再加上難度高,Cath玩了一日帆船後,她坦言未有像粵劇與肚皮舞船會玩上癮,她說:「學揸帆船用到嘅力度好大,有啲位船長要我用力拉,但用嗰個力同我使出嘅大好多,拉到好痛,實在有難度。」話雖如此,船長對於Cath的表現都十分滿意,說道:「王同學其實好好  ,嗌佢做乜佢都肯做,明知自己唔夠力,佢都肯去試,好難得。」 

對於揸帆船未有上癮,但Cath都享受在海中的感覺,更說:「坐喺度真係好舒服,我呢排工作上真係有啲Chur,但嚟到呢度係完全乜都唔記得晒,加上一定要放低電話,唔使覆電話,係幾爽嘅事。風會不斷吹住你,但平時落街喺屋企附近會覺得好熱,但上到船有風,攰但好舒服,搖下搖下我就覺得好眼瞓,所以我而家開始語無倫次,因為我真係好眼瞓!」 

zh_HKChinese