Skip to content
Latest News
高唱別人的歌 炮製驚喜音樂異想Live Moments 
08/28/2022
<strong>高唱別人的歌 炮製驚喜音樂異想</strong><strong>Live Moments</strong> 

《FWD 富衛保險呈獻 

“我是現場”音樂會005 Chen Boyu x 王嘉儀 

陳柏宇氣場外露 王嘉儀台上拜會「大佬」 

由太陽娛樂、寰亞娛樂、棋人娛樂、CR娛樂製作主辦,POPM製作,FWD富衛保險呈獻,本地音樂會系列《我是現場》音樂會005為樂迷帶來陳柏宇 x 王嘉儀這個全新組合,昨晚二人於九龍灣國際展貿中心Star Hall首度合作,即挑戰高難度動作,唱出大量別人的歌,擦出教人意想不到的音樂火花,為樂迷帶來驚喜不斷的音樂異想Live Moments。Jason與Sophy經過這次合作後亦變得亦師亦友,完Show後仍雞啄唔斷大談音樂經。 

有別於過去《我是現場》音樂會,今次Jason與Sophy除了獻唱如新歌〈命盡頭〉、〈自然變態〉等自己的作品外,他們用上超過一半的時間大唱別人的歌,如馮允謙〈思念即地獄〉、柳應廷〈人類群星閃耀時〉、鄭欣宜〈先哭為敬〉、Serrini〈Let Us Go Then You And I〉等,當中很多歌曲更是重新編曲,給人耳目一新的感覺,但不講不知,決定好歌單時已是8月中的事,這次Jason與Sophy只用了個多星期去學習新歌,籌備過程極短,但Jason十分享受這次演出,並說:「我唱到〈人類群星閃耀時〉先開始入局冇咁緊張,不過今次個Show以音樂作主導,唱好多人哋嘅歌,可以改編都重新編曲,呢件事係非常大膽,因為唔係以娛樂出發而係以音樂性出發,我非常支持。」Sophy也十分認同,並指與Jason合作,也令歌曲升華,她說:「我自彈自唱自己的作品〈深淵〉,後段有Jason提升咗成件事,令首歌愈嚟愈澎湃,好正!係Live先可以感受到。至於唱人哋嘅歌,攞咗材料返嚟改編,演繹上會有唔同感覺,台上台下都可以好好享受。」 

經過今次的合作,Sophy感受到Jason唱歌的功力深厚,當知道對方原來有學唱歌後,便很想跟對方的歌唱老師拜師學藝,怎料卻擺出大烏龍,她在台上自爆道:「我問Jason跟邊個學唱歌,佢話係側田,我聽到未覺異樣,同Jason講我都想跟側田學唱歌,點知原來佢係話吉田!」結果惹來全場爆笑。Show後Jason與Sophy仍為演出作檢討,但Jason指Sophy的歌聲其實有其特質,說:「Sophy嘅歌聲有好多好嘢喺裡面,除咗好薄嘅頭聲之外,亦有一啲真音喺度,之前聽佢嘅歌冇特別留意到,係好嘢嚟嘅!再做多啲Training,會可以再有唔同嘅Vocal。」聽到Jason的讚賞,Sophy即說:「今次袋咗好多嘢落袋,開頭唔識Jason,只係久仰大名,咁近傾偈做show第一次,但每次問佢關於舞台或者用聲嘅問題,佢都會幫手分析,呢樣嘢好少前輩會咁坦白同你分享。」 

音樂以外,Sophy直指Jason在其他方面都是大佬!她解釋道:「佢本身嘅氣場都係霸氣,所以嗌佢大佬,同埋佢好照顧後輩,例如綵排時佢會好爽快教我點樣可以做得更好,呢樣嘢就係大佬啦!但佢講嘢嘅方式又好似朋友,我覺得呢樣嘢係令我好開心,多謝!」Jason聽到對方大笠高帽,即搞笑回應道:「我食漢堡包都有問佢食唔食,但其實冇預佢,哈!唔好客氣喇!我會Send返張單俾你。」 

en_USEnglish